مودی کو الزام تراشی کے بجائے مقبوضہ وادی میں انسانیت سوز مظالم پراظہار شرمندگی کرنا چاہیے ‘شہباز شریف

بھارتی رویہ چوری اور سینہ زوری کامظہر ہے،سرجیکل سٹرائیک کی باتیں حماقت ہیں، بھارتی قیادت عقل اور ہوش کے ناخن لے، ہماری بہادر مسلح افواج ہر مہم جوئی کا منہ توڑ جواب دینے کے لئے تیار ہے،بیان

لاہور (این ٹی ایس نیوز)قومی اسمبلی میں قائد حزب اختلاف شہبازشریف نے بھارتی وزیراعظم کے بیان کی مذمت کرتے ہوئے کہا ہے کہ بھارتی وزیراعظم کو پاکستان پر الزام تراشی کے بجائے مقبوضہ جموں وکشمیر میں انسانیت سوز مظالم پراظہار شرمندگی کرنا چاہیے ،بھارتی رویہ چوری اور سینہ زوری کامظہر ہے،سرجیکل سٹرائیک کی باتیں حماقت ہیں، بھارتی قیادت عقل اور ہوش کے ناخن لے ،ہماری بہادر مسلح افواج دشمن کے ہر مہم جوئی کا منہ توڑ جواب دے چکے ہیں اور آئندہ انشااللہ اس سے بھی زیادہ موثر انداز میں جواب دیں گے۔اتوار کے روز اپنے ایک بیان میں شہباز شریف نے کہا کہ بھارتی رویہ چوری اور سینہ زوری کامظہر ہے،پیلٹ گن سے بیس ماہ کی معصوم کشمیری بچی کی بینائی چھیننے پر بھارتی وزیراعظم کو اتنا تائو دکھانا چاہئے تھا۔ کلبھوشن یادیو کی گرفتاری بھارت کی پاکستان میں انتشار پھیلانے کی خواہش اور عزائم کا زندہ اور چلتا پھرتا ثبوت ہے،یہ وہ حقیقت ہے جس سے بھارت نظریں چرا نہیں سکتا۔ شہباز شریف نے کہا کہ پلوامہ واقعہ کی پاکستان نے مذمت کی ہے ،کسی تحقیق کے بغیر ہی پاکستان کو اس واقعہ سے جوڑ دینا پہلی بار نہیں ہوا،اس سے پہلے بھی بھارت نے خود ایسے مشکوک واقعات رچائے جس پر پوری دنیا نے سوال اٹھائے،تاریخ گواہ ہے کہ بھارت الیکشن اور دیگر مواقع پر ایسے واقعات کو تحریک آزادی کشمیر اور پاکستان کو بدنام کرنے کے لئے استعمال کرنے کی کوشش کرتاآیا ہے۔ انہوں نے کہا کہ بھارت جموں وکشمیر کے عوام پر ظلم بند کرے، وہاں آبادی کا تناسب بدلنے کے مذموم ہتھکنڈوں سے باز آئے،پاکستان اور بھارت میں امن کی راہ کشمیر سے ہوکر ہی گزرتی ہے،پائیدار امن وسلامتی اور ترقی کے لئے مسئلہ کشمیر اقوام متحدہ کی قراردادوں اور مظلوم کشمیریوں کی خواہشات کے مطابق حل کرنے کا وعدہ پورا کیاجائے۔شہباز شریف نے کہا کہ سرجیکل سٹرائیک کی باتیں حماقت ہیں، بھارتی قیادت عقل اور ہوش کے ناخن لے ،پہلے سرجیکل سٹرائیک کی جھوٹی داستانوں کو اتنا مذاق بنا کہ بھارتی حکمرانوں نے اس پر بات کرنا ہی چھوڑ دی تھی،ہماری بہادر مسلح افواج دشمن کے ہر مہم جوئی کا منہ توڑ جواب دے چکے ہیں اور آئندہ انشااللہ اس سے بھی زیادہ موثر انداز میں جواب دیں گے،پوری قوم اپنی مسلح افواج کے شانہ بہ شانہ دشمن کے عزائم خاک میں ملانے کے لئے ساتھ ہے۔