پوری قوم متحد ہو کر بھارت کے جنگی جنون کا جواب دینے کے لیے تیار ہے، اسپیکر قومی اسمبلی

ایوان کا کسٹوڈین ہونے کے ناطے سب کو ساتھ لے کر چلوں گا۔۔۔ میڈیا بحران کے حل کے لیے اپنا کردار ادا کرنے کو تیار ہوں،وفدسے گفتگو
اسلا م آباد(این ٹی ایس رپورٹ)سپیکر قومی اسمبلی اسد قیصر نے کہا ہے کہ پوری قوم متحد ہو کر بھارت کے جنگی جنون کا جواب دینے کے لیے تیار ہے اورپارلیمنٹ کی جانب سے بھار ت کی طر ف سے دی جانے والی دھمکیوں کا مشترکہ اوردوٹوک جواب دیا جائے گا۔ان خیالات کا اظہار انہوں نے پارلیمانی رپورٹرز ایسوسی ایشن کے وفد سے گفتگو کرتے ہوئے کیا جس نے بدھ کے روز پارلیمنٹ ہاوس میں سپیکر سے ملاقات کی۔ سپیکر نے کہا کہ قومی اسمبلی کے بدھ کو ہونے والے اجلاس میں بھارت کے جنگی جنون پر بحث کرائی جائے گی اور بھارت کے جنگی جنون کے خلاف مشترکہ قرار داد بھی منظور کی جائے گی۔ انہوں نے مزید کہا کہ بھارت کے جنگی جنون کے معاملہ پر چیئرمین سینیٹ صادق سنجرانی، سینیٹ میں اپوزیشن لیڈر راجہ ظفرالحق اور وزیرخارجہ سمیت دیگر پارلیمانی رہنماوں سے بات ہوئی ہے جس میں بھارت کو مشترکہ اور واضح پیغام دینے کے لیے مشترکہ و متفقہ قرارداد منظور کرانے پر اتفاق کیا گیاہے ۔ انہوں نے کہا کہ سیاسی افراتفری کے ماحول میں خواہش ہے کہ اسمبلیاں چلیں اور زیادہ سے زیادہ قانون سازی کرکے عوام کو ریلیف فراہم کریں۔انہوں نے کہا کہ قومی اسمبلی میں عوامی مفاد کے قوانین جلدمنظوری کے لیے پیش کیے جائیں گے ۔اسد قیصر نے کہا کہ اس وقت 700 ایسے قوانین کی نشاندہی کی گئی ہے جس میں ترامیم کی گنجائش موجود ہے ۔اس ضمن میں ایک خصوصی کمیٹی تشکیل دی جائے گی جو ان مجوزہ ترامیم کا جائزہ لے کر ایوان کو پیش کرے گی۔ایک سوال کے جواب میں انہوں نے کہا کہ ایوان میں جو جس کا مینڈیٹ ہے اس کے مطابق اس کا احترام کیا جائے گا۔سپیکر نے کہا کہ ایوان کا کسٹوڈین ہونے کے ناطے سب کو ساتھ لے کر چلوں گا۔ انہوں نے کہا کہ میڈیا بحران کے حل کے لیے اپنا کردار ادا کرنے کو تیار ہوں۔ انہوں نے پی آراے کو اپنی تجاویزدینے کے لیے کہا ۔انہوں نے یقین دلایا کہ وہ اس سلسلے میں وزیراعظم سے اس ایشو پر بات کریں گے کہ میڈیا کے مسائل کے حوالے سے خصوصی پارلیمانی کمیٹی کی تشکیل پر غور کیا جائے گا۔