اسلام آباد (این ٹی ایس رپورٹ) اسلام آباد ہائیکورٹ نے سابق وزیراعظم محمد نواز شریف کی طبی بنیادوں پر سزا معطلی کی درخواست پر فریقین کو نوٹس جاری کرتے ہوئے سماعت 12فروری تک ملتوی کر دی ہے۔بدھ کو عدالت عالیہ کے جسٹس عامر فاروق اور جسٹس محسن اختر کیانی پر مشتمل ڈویژن بینچ نے محمد نواز شریف کی درخواست پر سماعت کی۔ سماعت کے دوران سابق وزیراعظم کی میڈیکل رپورٹس عدالت میں جمع کرائی گئی۔ عدالت نے رپورٹس کی کاپیاں فریقین کو دینے کا حکم دیتے ہوئے نیب سے آئندہ سماعت پرجواب طلب کرلیا ہے۔جمع کرائی رپورٹ میں کہا گیا ہے کہ محمد نوازشریف کو دل کی شریانوں کامرض لاحق ہے اور بلڈ شوگر اور بلڈ چارٹ کو معمول پر رکھنا ضروری ہے، محمد نوازشریف کو ایسے ہسپتال میں رکھا جائے جہاں 24 گھنٹے بہترین طبی سہولتیں میسر ہوں۔ سماعت کے دوران عدالت نے خواجہ حارث سے استفسار کیا کہ سزا معطلی سے متعلق دوسری درخواست پر سماعت کب ہوگی جس پر خواجہ حارث نے کہا کہ انہوں نے وہ درخواست واپس لینے کی درخواست دے دی ہے اب حالات ایسے ہیں کہ عدالت طبی بنیادوں پرضمانت کی درخواست کوسنے۔ عدالت نے قرار دیا کہ مرکزی اپیل کی سماعت 18 فروری کو ہے دونوں درخواستیں ایک ساتھ سماعت کیلئے مقرر کردیتے ہیں جس پرخواجہ حارث نے استدعا کی کہ 18 فروری دور ہے درخواست جلد سماعت کیلئے مقررکی جائے۔ جس پر عدالت نے فریقین کومیڈیکل رپورٹس کی کاپیاں فراہم کرنے کا حکم دیتے ہوئے نیب سے جواب طلب کرتے ہوئے سماعت 12 فروری تک ملتوی کر دی۔ سماعت کے دوران نیب حکام نے درخواست ضمانت کی مخالفت کرتے ہوئے موقف اختیار کیا ہے کہ صرف بیماری کی وجہ سے سزا یافتہ مجرم کو ضمانت نہیں دی جا سکتی۔عدالت نے محمد نوازشریف کے علاج سے متعلق تمام تفصیلات طلب کرتے ہوئے آئندہ سماعت کے لیے محکمہ داخلہ پنجاب سے جواب طلب کرلیا ہے۔ واضح رہے کہ 24 دسمبر 2018 کو احتساب عدالت نے سابق وزیراعظم محمد نواز شریف کوالعزیزیہ اسٹیل ملز ریفرنس میں 7 سال قید اور جرمانے کی سزا سنائی تھی، جس کے بعد نیب نے انہیں گرفتار کرکے جیل منتقل کردیا تھا۔محمد نواز شریف کے وکلاء کی طرف سے 26 جنوری کو دائر کی گئی ایک درخواست میں موقف اختیار کیا گیا تھا کہ سابق وزیراعظم کی صحت غیر تسلی بخش ہے انہیں عارضہ قلب اور گردوں کا مرض لاحق ہے، لہذا ان کی درخواست ضمانت پر العزیزیہ اور فلیگ شپ ریفرنسوں کی اپیلوں سے پہلے فیصلہ سْنایا جائے اور العزیزیہ اسٹیل ملز ریفرنس میں سزا معطل کرکے نواز شریف کو طبی بنیادوں پر ضمانتی مچلکوں کے عوض رہا کیا جائے۔دائر درخواست کے ساتھ اسپیشل میڈیکل بورڈ کی 17 جنوری کی رپورٹ بھی جمع کرائی گئی تھی۔
0 comments:
Post a Comment