سپریم کورٹ :چیک بونس کے مقدمے میں ملزم گرفتار

تفتیش میں کسی کو گنہگار یا بے گناہ کرنا پولیس کا کام نہیں ، چیف جسٹس آصف سعید کھوسہ

لاہور (رپورٹ این ٹی ایس) سپریم کورٹ لاہور رجسٹری میں چیک بو نس کے مقدمے میں نامزد ملزم عدالت سے گرفتارکر لیا گیا۔ چیف جسٹس پاکستان آصف سعید کھوسہ نے ریمارکس دیئے کہ تفتیش میں کسی کو گنہگار یا بے گناہ کرنا پولیس کا کام نہیں یہ کام عدالت کا ہے۔ ضابطہ فوجداری کے تحت پولیس شہادتیں اکٹھی کیوں نہیں کرتی۔ اس مقدمے میں پولیس نے ثبوت کیوں اکٹھے نہیں کئے۔ جو چار سوال عدالت نے پوچھے انہیں پر تفتیشی افسر نے کام کرنا تھا۔ تفتیش کرنا عدالت کا کام نہیں، اگر تفتیش کرنا ہمارا کام ہوتا تو انہی خطوط پر تفتیش کرتے ۔فاضل چیف جسٹس نے کہا کہ جب سے چیک بونس کا قانون بنا ہے دستخط شدہ چیک چوری ہونے کے واقعات سامنے آنا شروع ہو گئے۔چیک پر دستخط کر کے اپنے پاس کیوں رکھے جاتے ہیں دئیے کیوں نہیں جاتے۔اگر عدالت نے عبوری ضمانت کی درخواست مسترد کی تو ملزم کے حق میں اچھا نہیں ہوگا۔ مدعی اللہ رکھاکا کہنا تھا کہ ملزم کوکاروبار کے لیے رقم دی واپسی کا تقاضا کیا تو چیک دے دیا گیا جو بعد میں بونس ہو گیا۔