بیلٹ اینڈ روڈ منصوبے سے پاکستان میں توانائی بحران میں کمی آئی،عمران خان

 موسمیاتی تبدیلیوں کے اثرات کو کم کرنے کیلئے مشترکہ کوششیں، سیاحت کا فروغ ، کرپشن اور وائٹ کالر کرائمز کے خلاف مشترکہ حکمت عملی، غربت کے خاتمے کے لیے فنڈز کا قیام اور تجارت و سرمایہ کاری کے لیے ماحول بہتر بنانے کی کوششیں ،وزیراعظم عمران خان کے پانچ نکات

بیجنگ(این ٹی ایس رپورٹ) وزیراعظم عمران خان نے کہا ہے کہ بیلٹ اینڈ روڈ منصوبے سے پاکستان میں توانائی بحران میں کمی آئی اور چین کے تعاون سے گوادر تیزی سے دنیا کا تجارتی مرکز بن رہا ہے،چین نے گزشتہ 30 برس میں تیزی سے ترقی کی منزلیں طے کیں پاکستان غربت میں کمی کیلئے چین سے سیکھنا چاہتا ہے جس کیلئے چین کی حکومت کا بھرپور تعاون حاصل ہے، پاکستان افغانستان میں امن کیلئے کرداراداکررہا ہے بھارت سے الیکشن کے بعد مذاکرات شروع ہونے کی توقع ہے۔وزیراعظم عمران خان نے چین کے میگا منصوبے ’’ون بیلٹ ون روڈ‘‘ کے ثمرات عوام تک پہنچانے کے لیے 5 نکات پیش کردیے،چین کے دارالحکومت بیجنگ میں ’’بیلٹ اینڈ روڈ فورم‘‘ 2019' کی افتتاحی تقریب میں وزیراعظم نے اپنے پیش کردہ پانچ نکات میں کہا، موسمیاتی تبدیلیوں کے اثرات کو کم کرنے کے لیے مشترکہ کوششیں، سیاحت کا فروغ ، کرپشن اور وائٹ کالر کرائمز کے خلاف مشترکہ حکمت عملی، غربت کے خاتمے کے لیے فنڈز کا قیام اور تجارت و سرمایہ کاری کے لیے ماحول بہتر بنانے کی کوششیں کی جائیں، پاکستان اور چین سی پیک کے اگلے فیز کی جانب بڑھ رہے ہیں جس میں اسپیشل اکنامک زونز کا قیام ہوگا، بیلٹ اینڈ روڈ منصوبے سے پاکستان میں توانائی بحران میں کمی ہوئی اور چین کے تعاون سے گوادر تیزی سے دنیا کا تجارتی مرکز بن رہا ہے۔انہوں نے کہا کہ ’’ون بیلٹ ون روڈ‘‘ منصوبہ سیاحت کو فروغ دینے کے لیے اہم ہے اور پاکستان چین کی اس بڑی کاوش کا ابتدائی شراکت دار ہے پاکستان اور چین کے درمیان آزاد تجارت کا معاہدہ اہمیت کا حامل ہوگا ہم بنیادی ڈھانچے، ریلوے ، آئی ٹی اور توانائی میں چین کے ساتھ تعاون چاہتے ہیں اس کے ساتھ زراعت، صحت اور تعلیم میں تعاون کے بھی خواہاں ہیں، وزیراعظم نے بتایا کہ غربت کے خاتمے کے لیے پاکستان میں ’احساس‘ کے نام سے ایک پروگرام شروع کیا گیا ہے اور ماحول کی بہتری کے لیے دس ارب درخت لگانے کے منصوبے کا بھی آغاز ہوچکا ہے،عمران خان نے اس موقع پر شرکاء کو یقین دہانی کرائی کہ پاکستان وائٹ کالر جرائم کے خاتمے کے لیے بھر پور اقدامات کر رہا ہے کیونکہ وائٹ کالر کرائم ہی ترقیاتی کاموں کو برباد کرتا ہے، پاکستان میں سرمایہ کاری کی دعوت دیتے ہوئے وزیر اعظم نے کہا کہ اقتصادی ترقی کے لیے نجی شعبے کی حوصلہ افزائی کر رہے ہیں اور پاکستان غیر ملکی سرمایہ کاروں کو پْرکشش مواقع فراہم کر رہا ہے، دوسرے بیلٹ اینڈ روڈ فورم سے خطاب کرنا میرے لیے اعزاز کی بات ہے کیونکہ فورم باہمی رابطوں اور شراکت داری کا اہم ذریعہ ہے اور پاکستان کی غیر مشروط حمایت پر چین کی قیادت کا شکرگزار ہوں، پْرامن اور ترقی یافتہ دنیا کے لیے ہماری کوششیں جاری ہیں اور اس مقصد کے لیے پاکستان خطے میں امن و استحکام کے لے بھر پور کوششیں کر رہا ہے۔ وزیراعظم نے کہا کہ پاک چین دوستی کے حوالے سے ایسوسی ایشن کی کوششوں کا معترف ہوں، چین نے گزشتہ 30 برس میں تیزی سے ترقی کی منزلیں طے کیں پاکستان غربت میں کمی کیلئے چین سے سیکھنا چاہتا ہے جس کیلئے چین کی حکومت کا بھرپور تعاون حاصل ہے، پاکستانی عوام جانتے ہیں چین نے ہرمشکل وقت میں مدد کی۔وزیراعظم نے کہا کہ پاکستان افغانستان میں امن کیلئے کرداراداکررہا ہے بھارت سے متعلق بات کرتے ہوئے انہوں نے کہا کہ بھارت سے الیکشن کے بعد مذاکرات شروع ہونے کی توقع ہے۔