پارٹی قیادت اور سینئر رہنماؤں پر ذاتی حملے نہ کئے جائیں، سپیکرقومی اسمبلی کی اپیل
فواد،شیخ رشید،مراد سعید اور شہریار آفریدی کو کنٹرول کریں ماحول بہتر ہو جائیگا، ن لیگ اور پیپلز پارٹی کا جواب
اسلام آباد ( آن لائن) سپیکراسد قیصر نے قومی اسمبلی کا ماحول بہتر بنانے کیلئے متحرک ہوگئے ، ن لیگ اور پیپلز پارٹی کے سینئر رہنماوں سے رابطے کر کے پارٹی قیادت پر ذاتی حملے نہ کرنے کی اپیل کی ہے تاہم پیپلز پارٹی اور ن لیگ نے قومی اسمبلی کے ماحول خراب کرنے کی ذمہ داری وزراء پر ڈال دی ۔ تفصیلات کے مطابق گزشتہ قومی اسمبلی کے اجلاس میں وزیراعظم عمران خان کی آمد پر ہنگامہ آرائی کا معاملے پر حکومتی وزراء اور پارٹی قیادت نے تشویش کا اظہار کیا ہے اور اس حوالے سے سپیکر قومی اسمبلی کو ذمہ داری سونپی ہے کہ قومی اسمبلی کا ماحول بہتر کرنے کیلئے اپنا کردار ادا کریں جس کے بعد سپیکر قومی اسمبلی اسد قیصر نے مسلم لیگ (ن) اور پیپلز پارٹی کے سینئر اراکین اسمبلی سے رابطہ کیا ہے اور اس حوالے سے تفصیلی بات چیت کی ،سپیکر اسد قیصر نے ایوان کے ماحول میں بہتری لانے کیلئے دونوں پارٹیوں سے رہنمائی کی اپیل کی ہے اور کہا کہ تمام سیاسی جماعتوں کی قیادت قابل احترام ہے کسی پر ذاتی حملے نہ کئے جائیں ،رپورٹ کے مطابق مسلم لیگ (ن ) اور پیپلز پارٹی نے ایوان کا ماحول خراب کرنے کی ذمہ داری چند وزراء4 پرڈال دی ہے اور کہا کہ فواد چودھری، شیخ رشید، مراد سعید اور شہریار آفریدی ماحول خراب کرتے ہیں، حکومت چاہتی ہے کہ وزیراعظم کی ذات پر تنقید نہ ہو تو اپنے وزراء کی منہ بندی کی جائے ہماری قیادت پر ذاتی حملے ہوں گے تو جواب ضرور دیں گے، سپیکر ماحول خراب کرنے والے وزراء4 کے خلاف سخت ایکشن لیں گے تو ایوان کا ماحول بہتر ہو جائے گا ،سپیکر قومی اسمبلی نے یقین دہانی کرائی ہے کہ وزراء کے رویہ کے خلاف قیادت سے بات کروں گا ۔
0 comments:
Post a Comment